Ang Sangguniang Bayan may duha ka bag-o nga ex-officio nga mga katapu bangud sang pagpili sa ila palangakuan. Sila amo sanday Mariano P. Villalobos, ang bag-o nga presidente sang Liga Ng Mga Barangay, kag Raynald John P. Arillo, ang bag-o nga presidente sang Municipal Federation sang Sangguniang Kabataan. Ang duha napilian sa separado nga piniliay.

Ang Liga Ng Mga Barangay ginatapuan sang 68 ka mga barangay nga nagabug-os sang Cabatuan. Ang tagsa ka barangay ginapanguluhan sang punong barangay. Si Mariano P. Villalobos amo ang Punong Barangay sang Barangay Zone I (Rizal Ilawod Street).

Sa pihak nga bahin, ang tagsa ka barangay sa banwa may Sangguniang Kabataan nga ginapanguluhan sang chairman. Si Raynald John P. Arillo amo ang SK Chairman sang Barangay Zone V (Huesca Street-Confesor Drive).

Si Honorable Mariano P. Villalobos nakapangalagad bilang presidente sang Association of Barangay Captains (karun Liga Ng Mga Barangay). Siya napilian man nga katapu sang Sangguniang Bayan kag nagsirbe bilang konsehal sa sulod sang tatlo ka tuig.

Ang bag-o nga presidente sang Municipal Federation sang Sangguniang Kabataan, si Honorable Raynald John P. Arillo, nagabutho bilang first year student sang Central Philippine University sa diin siya nagakuha sang kurso sa Nursing. Siya anak ni Raynaldo Arillo, isa ka seaman, kag ni Victoria Pueyo, isa ka manunudlo sa Cabatuan National Comprehensive High School.